هندسة الأزهر
السلام عليكم ..اهلا وسهلا بك عزيزى الزائر نورت المنتدى بزيارتك لنا ..انت غير مسجل فى منتدى كليه هندسه الازهر ..سوف تتمتع بالعديد من المميزات اذا قمت بالتسجيل وذلك بالضغط على الزر اسفله(زر التسجيل) اما اذا كنت مسجل بالفعل ..فلتسجل دخولك عن طريق الضغط على الزر اسفله(زر الدخول) اما اذا كنت تريد اخفاء هذه الرساله فاضغط على الزر اسفله (زر الاخفاء)

هندسة الأزهر

معا لنتواصل.... من أجل حياة جامعية أفضل.
 
الرئيسيةدخولالتسجيلمكتبة الصوردخول الاعضاء

شاطر | 
 

 إلى طلبة وطالبات الفرقه الإعداديه الراغبين فى الإلتحاق بقسم عماره

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
نبيل احمد
مهندس جديد
مهندس جديد


عدد الرسائل : 4
العمر : 30
العمل/الترفيه : مهندس معمارى
الـكـلـيـــة : : الهندسة
قسم العمارة


مُساهمةموضوع: إلى طلبة وطالبات الفرقه الإعداديه الراغبين فى الإلتحاق بقسم عماره   الإثنين سبتمبر 06, 2010 9:38 pm

[center][size=18]ا[center]لسلام عليكم ورحمة الله وبركاته
بناء على طلب إخوانى وأخواتى طلبة وطالبات الفرقه الإعداديه قمت بإنشاء هذا الموضوع لكى أعطيهم فكره عن قسم العماره وياريت زملائى فى الأقسام التانيه يعملوا موضوع يتكلموا فيه عن القسم بتاعهم علشان نقدر نفيد طلبة إعدادى ونفتكر ان احنا كنا فى يوم من الايام زيهم وكنا محتاجين حد يوجهنا ويرشدنا وجزاكم الله خير .

وقد قمت بتقسيم الموضوع الى عدة عناصر
أولا:- طبيعة الدراسه فى القسم
ثانيا:- يوميات طالب فى قسم العماره
ثالثا:- نصيحه من مجرب
رابعا:- كورسات الكمبيوتر اللازمه لطلبة عماره
خامسا:- فرص العمل
سادسا:- مواد الفرقه الأولى

وسأتعرض لكل عنصر من هذه العناصر على حده

أولا:- طبيعة الدراسه بالقسم

بصراحه أنا كنت عاوز أخلى العنوان ده (مميزات وعيوب القسم) ولكن ممكن أكون أنا شايف ميزه فى القسم وفى نفس الوقت واحد غيرى ممكن يشوف الميزه دى عيب علشان كده فضلت إن العنوان يكون (طبيعة الدراسه بالقسم)

من طبيعة الدراسه بالقسم ما يأتى :-

1-قسم العماره يعتمد اعتماد كلى على الرسم الهندسى لأن المواد الاساسيه فى القسم ماهى الا مواد رسم وزى مالدكاتره والمعيدين بيقولوا لينا ان الرسم لغة العماره.
2-طبيعة الدراسه فى القسم بتتطلب منك الصبر والتحمل والمحاوله مره واتنين وتلاته علشان تتعلم وتستفاد وتكون فى النهايه مهندس ناجح كذالك بيتطلب منك الحضور المتواصل وعدم الغياب وبيتطلب منك أيضا الإطلاع الكتير والملاحظه بالعين لأن العين سلاح من أسلحة المهندس المعمارى وكل لما تشوف بعينك كل لما تترسب المناظر فى ذاكرتك وبالتالى تسطيع أن تخرج تصميمات زى اللى انت شوفتها أو احسن منها .
3-من طبيعة القسم عدم وجود كتب فى معظم المواد وبيكون اعتمادنا الكلى فى جمع المعلومات على المراجع الموجوده فى المكتبه وعلى شرح الدكاتره والمعيدين وتدوين المحاضرات بتاعتهم .
4-من طبيعة القسم إن اعمال السنه فى المواد الاساسيه بيكون 60% من الدرجه الكليه للماده و 40% لإمتحان اخر العام .
5-من طبيعة القسم كثرة الأبحاث يعنى حاينطلب منك أبحاث تعملها وفى أبحاث حاتحتاج منك زيارة أماكن والكلام ده كله .
6-من طبيعة القسم كثرة المصاريف يعنى اللى يدخل القسم ده ما يحطش فى دماغه مصاريف يعنى من ناحية المصاريف حاتصرف كتير قوى .
7-من طبيعة الدراسه فى القسم صعوبة الحصول على الدرجات ويمكن الموضوع ده من وجهة نظرى بس أو وجهة نظر بعض الطلبه لأن مواد الرسم بيكون عليها اعلى الدرجات وأنا واحد من الناس عمرى مارسمت لوحه بإيدى وطلعت نضيفه لازم تتوسخ من الرصاص والمسح الكتير وأنتو عارفين الكلام ده كله وانا برضو بطئ فى الرسم وإمتحان أخر السنه بيكون عاوز سرعه علشان كده بلاقى نفسى جايب مقبول فى مواد الرسم .
8-من طبيعة القسم إنك بتفضل تعبان طول السنه فى الرسم وبتيجى فى الإمتحانات ترتاح بخلاف زملاتك فى الأقسام التانيه وبيكون مش وراك غير شوية مواد نظرى بتذاكرها ليلة الامتحان وتدخل تحل فيها وتجيب فيها تقدير كمان وفى مواد بتفضل مش فاهم فيها حاجه طول السنه لكن قبل الامتحان لماتقعد مع زملاتك تلاقيك فهمتها وتدخل اللامتحان تحل فيها بفضل لله وممكن كمان تجيب تقدير فيها
9-من طبيعة القسم انك بتحس انك تايه طول السنه لكن قبل الامتحان بتلم نفسك زى ماقلت قبل كده لما بتقعد مع زملاتك وتفهموا بعض واللى فاهم حاجه يفهمها للتانى .
10-وبصراحه مخبيش عليكم إن فى بعض الدكاتره والمعيدين دمهم تقيل ومش بيفيدوك بحاجه ويحبوا يتعبوك وخلاص وفى بعضهم كويسين جدا وبيحبوا الطلبه ويفيدوهم وبيعاملونا زى اولادهم وأكتر كمان وأعتقد إن الموضوع ده فى كل الأقسام مش عندنا بس .


ثانيا :- يوميات طالب فى قسم العماره

تحت هذا العنوان احب أن أحكى لكم بإختصار شديد عن نفسى منذ أن دخلت القسم
وفى البدايه احب اعرفكم انى أخدت إعدادى عماره مش إعدادى عام زيكم وعمرى ماكنت بحب أدخل عماره دى خالص وكان نفسى قوى أدخل نظم لكن مفيش نصيب وجيت من الثانويه إعدادى عماره على طول وكنت كارها خالص وكنت حأحول كليه تانيه لكن أهلى منعونى من التحويل وفضلت أدرس فى القسم وأنا كارهه جدا لأنى عمرى ما كنت بحب الرسم ولاعندى صبر انى اقف على اللوحه طول الليل لكن أعمل ايه نصيبى كده فصبرت ولحد سنه تانيه كنت بكره القسم وسبحان الله مع إنى بكرهه الحمد لله كنت بنجح كل سنه ونجحت فى إعدادى بمقبول وفى أولى جيد وتانيه مقبول وتالته جيد وسنه تالته دى كانت نقطة التحول بالنسبه لى ابتديت أحب القسم نظرا لان الدكاتره بيسمحوا لينا ان احنا نرسم اتوكاد وكنت نادر جدا لما امسك المسطره والمثلثات وأرسم وابتديت أتناقش مع الدكاتره والمعيدين وأسألهم عن اى حاجه أنا مش فاهمها وإبتديت أفهم الشغل ماشى إزاى خصوصا لما نزلت مواقع وادربت فى مكتب
ولعل من أسباب كرهى للقسم من بداية دخوله إنى كنت بشوف الناس عندنا فى البلد لما تيجى تبنى بيت مابتجيبش مهندس ولاحاجه دا اللى بيقوم بشغل المهندس تلاقيه المقاول او نجار المسلح فكنت دايما أقول هو أنا حأدخل عماره وأطلع أبقا متساوى مع المقاول او نجار المسلح لكن بقا لما نزلت مواقع وادربت فى مكتب عرفت قيمة المهندس المعمارى وبالتالى بدأت أحب القسم .


ثالثا:- نصيحه من مجرب

أولا أحب أقولكم قبل ماتدخل اى قسم صلى صلاة استخاره واللى ربنا يريد بيه حايكون
ثانيا أوجه نصيحتى لكل اللى بيحب الرسم وكل اللى بيهوى هذا القسم انه مايترددش فى دخوله ,القسم بتاعنا ده عاوز واحد يكون بيحبه من البدايه واللى بيحب القسم ده من البدايه حايلاقى نفسه بيجيب تقديرات فيه ,وممكن تلاقى تعب شويه فى بداية دخولك القسم لأنك بتكون داخل أولى عماره من إعدادى عام وبتكون لسه مخدتش على نظام القسم بالإضافه إنك درست فى إعدادى رسم ميكانيكى ومعندكش فكره عن الرسم المعمارى وبصراحه أنا شايف إن رسم إعدادى ده المفروض يضيفوا عليه الرسم المعمارى ومش معنى كلامى ان الرسم المعمارى صعب لا دا بالعكس دا هو أسهل بكتير من الرسم الميكانيكى والدكاتره برضو بيراعوا كده فى سنه اولى وبيفهموكوا وحده وحده .


رابعا:-كورسات الكمبيوتر اللازمه لطلبة عماره

أحب أديلكم فكره عن كورسات الكمبيوتر اللازمه لطلبة عماره
1-برنامج الاتوكاد -2- برنامج ثرى دى ماكس -3- برنامج الفوتوشوب

وأهم كورس من الكورسات دى بالنسبه للدراسه هو كورس الاتوكاد
والمفروض على الاقل تكون داخل سنه تالته وبتعرف تشتغل أتوكاد لكن الماكس والفوتوشوب ممكن تمشى نفسك فى الدراسه من غيرهم لكن مهمين جدا فى الشغل بعد التخرج وطبعا علشان تبقوا عارفين إن الدكاتره فى القسم مابيسمحوش بالرسم على الاتوكاد قبل سنه تالته .
وطبعا فى برامج المفروض تكون بتعرف تشتغل عليها زى برامج الاوفيس (الورد – البوربوينت )
علشان حايكون مطلوب منك أبحاث تعملها ومش ضرورى انك تاخد دورة اوفيس ممكن تكون بتعرف تشتغل اوفيس بالخبره من غير دورة ولا حاجه .


خامسا:- فرص العمل

أنا شايف ياجماعه ان احنا لما نيجى نتكلم فى موضوع فرص العمل دى يعنى بنتكلم فى الرزق وطبعا كل واحد رزقه مكتوب من قبل لما يتولد يعنى موضوع الشغل ده بتاع ربنا
فلو انت بتبص للقسم من ناحية شغله بعد التخرج إذن انت فى الحاله دى عاوز شهاده علشان تشتغل بيها مش عاوز تتعلم وتكون مهندس وفى فرق بين واحد عاوز يكون مهندس وواحد عاوز شهاده
ومع كده أنا بقول إن فرص العمل بالنسبه لعماره ولجميع الاقسام متوفره بكثره وده اللى انا شايفه حاليا ,انا اعرف ناس اتخرجوا السنه اللى فاتت من عماره ومن أقسام تانيه سافروا بره واللى بيشتغلوا فى مصر بياخدوا مرتبات عاليه يعنى المهندس اللى لسه متخرج مرتبه مبيقلش عن ألف جنيه
ونصيحه منى لما تيجى تختار القسم اللى تدخله ماتبصش لفرص العمل ولا الكلام ده إنت أول حاجه تبص ليها هى طبيعة الدراسه بالقسم وهل حاترتاح فيه واللا لا هو ده اللى يفرق قسم عن قسم تانى وأنا من وجهة نظرى إن كل الاقسام كويسه مفيش قسم وحش إنت بس تشوف القسم اللى ترتاحله وترتاح فيه وبعدين موضوع الرزق ده سيبه على ربنا .


سادسا:- مواد الفرقه الأولى

وأخيرا تعالوا لنلقى نظره سريعه على مواد الفرقه الاولى و قبل أن اذكر المواد دى أحب أعرفكم إن فى مواد من مدنى بتاخدها مع مواد عماره

أ‌-مواد عماره

1-التصميم المعمارى
ودى ماده أساسيه معاك من اولى لحد رابعه وكلها رسم بالاضافه للابحاث اللى بتعملها فى بداية كل مشروع بتاخده وطبعا بتكون مشاريع سنه أولى صغيره بتبقا مثلا (عماره سكنيه-فيلا-حضانه-مكتبه) وبتبتدى تاخد مشاريع أكبر فأكبر لحد ماتوصل مشروع التخرج فى رابعه ومادة التصميم من وجهة نظرى فلسفيه أكثر منها هندسيه وتلاقى ان كل دكتور له فكر يختلف عن فكر دكتور أخر فى التصميم المعمارى .
2-إنشاء معمارى
ودى برضو ماده أساسيه بس حاتكون معاك فى اولى وتانيه بس وبرضو كلها رسم بالاضافه للابحاث اللى حاتعملها وبتاخد فيها تمارين ترسمها وتصححهاوتسلمها وكورس سنه أولى بيكون كتمهيد لمادة التصميمات التنفيذيه فى سنه تانيه .

3-رسم معمارى ونظرى
والماده دى بتتعلموا فيها الرسم المعمارى وعمل المجسمات والماده دى فى سنه أولى بس .

4-ظل ومنظور
والماده دى بتتعلموا فيها ازاى ترسموا مجسم لاى مبنى زى ما كنتوا بترسموا ايزومترى فى اعدادى بس المنظور بيكون مرسوم زى ما عينك شيفاه وليس بأطوال حقيقيه والكلام ده بيتوقف على زاوية الرؤيه اللى انت شايف بيها وليها قوانين بتمشى عليها علشان تطلع المنظور والماده دى فى أولى بس .

5-نظريات تصميم
والماده دى نظرى وبتدرس فيها حركة الرياح وتأثير أشعة الشمس على المبنى الى اخره والماده دى بتدرسها من أولى لحد رابعه بس كل سنه كورس مختلف .

6-تاريخ العماره

والماده دى نظرى برضو وبتدرس فيها العماره الفرعونيه وعمارة عصر النهضه وكل العمارات اللى قبل العماره الاسلاميه وفى سنه تانيه بتدرس تاريخ العماره الاسلاميه والماده دى فى اولى وتانيه.

7-تطبيقات الكمبيوتر فى العماره

وبتدرس فيها برنامج الاتوكاد وهى فى سنه اولى بس .

ب‌-مواد مدنى

1-المساحه

وبتدرس فيها كيفية قياس المساحات المختلفه وحساب المناسيب و حساب مكعبات الحفر والردم الى اخره وبتدرسها فى اولى بس.

2- نظرية إنشاءات

وبتدرس فيها الجمالونات وحساب العزوم وقوى القص والقوى الافقيه وبتاخدها فى سنه اولى وتانيه وبتكون كمقدمه لمادة المنشأت المعدنيه والخرسانه المسلحه اللى بتدرسهم فى سنه تانيه .

2-خواص مواد وإختبارات

وبتدرس فيها خواص مواد البناء مع عمل إختبارات عليها والماده دى فى أولى بس .


بالإضافه إلى مواد
1-القران
2-السيره
3-اللغه الانجليزيه


وإن شاء الله اللى حايدخل القسم وعاوز منى أى مساعده فى أى ماده أنا تحت أمره و أحنا مع بعض فى الكليه إن شاء الله .

وفى النهايه أرجو من الله تعالى أن أكون قد وفقت فى إفادتكم ولاتنسونى من الدعاء
أطلب منكم أن تدعوا لى بكل ماهو صالح لى فى دنياى واخرتى (اعوا الله لى ان يهدينى ويصلح حالى ويوفقنى لما يحبه ويرضاه وأن يغفر ذنوبى وأن يحقق لى ما أتمناه )
وبالتوفيق انشاء الله

الرجوع الى أعلى الصفحة اذهب الى الأسفل
الهواري
مراقب عام على اقسام المنتدى
مراقب عام على اقسام المنتدى


عدد الرسائل : 1357
العمر : 27
العمل/الترفيه : طالب
الـكـلـيـــة : : الهندسة

مُساهمةموضوع: رد: إلى طلبة وطالبات الفرقه الإعداديه الراغبين فى الإلتحاق بقسم عماره   الإثنين سبتمبر 06, 2010 10:14 pm

جزاك الله خيرا ياباشمهندس نبيل علي موضوعك القيم ، ربنا يتقبل منك ويجعله في ميزان حسناتك ان شاء الله

ويارب تاخد اعفي من الجيش وترجعلنا بسرعة معيد ف الكلية وأخ اكبر لينا جميعا وللا انت ناوي تبيعنا وتسيب الكلية للأبد Crying or Very sad
الرجوع الى أعلى الصفحة اذهب الى الأسفل
نبيل احمد
مهندس جديد
مهندس جديد


عدد الرسائل : 4
العمر : 30
العمل/الترفيه : مهندس معمارى
الـكـلـيـــة : : الهندسة
قسم العمارة


مُساهمةموضوع: رد: إلى طلبة وطالبات الفرقه الإعداديه الراغبين فى الإلتحاق بقسم عماره   الثلاثاء سبتمبر 07, 2010 2:06 am

شكرا على المرور الطيب
طبعا حتى لو ما كنتش معيد فا شاء الله معاكم بقلبى وعقلى وانا تحت امركم فى اى شى
الرجوع الى أعلى الصفحة اذهب الى الأسفل
شريف يوسف
مهندس جديد
مهندس جديد


عدد الرسائل : 1
العمر : 48
العمل/الترفيه : فنى مدنى
الـكـلـيـــة : : كلية الفنون الجميلة - وحدة الت

مُساهمةموضوع: رد: إلى طلبة وطالبات الفرقه الإعداديه الراغبين فى الإلتحاق بقسم عماره   الثلاثاء أبريل 30, 2013 4:51 am

المهندس نبيل , جزاك الله خيرا على هذا المجهود الرائع الذى قمت به و مررت بتجربة شاقة حتى اتمها الله عز و جل بالنجاح الى جانب انك قد قمت ايضا بشرح و باختصار شديد عن الظروف الصعبة و تقديم الحلول للمشاكل التى مررت بها كما عرضت المساعدة بصرف النظر عن انك معيد بالجامعة
باشمهندس نبيل ... انت فعلا انسان نبيل

احب اعرفك بنفسى .. شريف محمد يوسف حاصل على ثانوية عامة شعبة رياضة دفعة 1994
و نويت باذن الله التقدم لكلية فنون جميلة قسم عمارة بالتعليم المفتوح بالاسكندرية
تقدمت للاستعلامات لمعرفة الشروط و المصاريف و ..... و ..... فعلمت اننى لابد من ان ادرس كورس قدرات اولا و بعد النجاح بالكورس انشاء الله يتم التحاقى باعدادى عمارة
والان احاول جاهدا ان اتعرف على بعض النماذج الخاصة بهذا الكورس و استغل الوقت فى المحاولة و التدريب على طريقة عمل اسكتشات مفيدة لهذا لاختبار و خصوصا ان ميعاد التقدم للكورس اول اغسطس باذن الله

ارجو ان اجد لديك احد هذه النماذج و لكم منا وافر الشكر و التقدير
و جزاكم الله خيرا
الرجوع الى أعلى الصفحة اذهب الى الأسفل
Amr Abualwafa
مهندس جديد
مهندس جديد


عدد الرسائل : 1
العمر : 22
العمل/الترفيه : عماره
الـكـلـيـــة : : كلية الهندسه

مُساهمةموضوع: رد: إلى طلبة وطالبات الفرقه الإعداديه الراغبين فى الإلتحاق بقسم عماره   الخميس أغسطس 22, 2013 8:47 am

بجد انا تشرفت و اتشرف اني قرأت كلام حضرتك و اتمني لو الاقي اكونت حضرتك علي الفيس بوك
و ربنا يجعله في مزان حسناتك Smile
الرجوع الى أعلى الصفحة اذهب الى الأسفل
 
إلى طلبة وطالبات الفرقه الإعداديه الراغبين فى الإلتحاق بقسم عماره
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
هندسة الأزهر  :: الكـلـيـة وأقـسـامــهـا :: قسم الهندسة المعمارية :: الفرقة الاولي-
انتقل الى: